Интересен податок. Со осмата верзија на популарниот аудио секвенцер (и многу повеќе од тоа) FL Studio, доаѓа можноста за директно извезување на сработените песни во отворениот Ogg аудио формат.

Ова не е којзнае колку голем чекор, но сепак е за поздравување, иако лично сметам дека ќе имаше многу поголема смисла Image-Line да си го фатеа редот како што треба, па да нудеа Оgg од самите почетоци на FL Studio. Сепак, сега засега FL Studio (колку што јас сум запознаен) е единствената затворена апликација за музичка продукција што му ги отвора вратите на Ogg.

Периодов сум активен на Soundsnap - бесплатен сервис за споделување оригинални аудио записи, започнат од пријателот Tasos Frantzolas и доработен со помош на 20-тина негови помошници. Soundsnap има претензии да стане најголемата онлајн библиотека на бесплатни звуци на Интернет. Супер му оди и тоа ме радува. На SoundSnap има навистина голема разновидност од звуци, па може да се најде сè од незначителни шушкања на хартија и крцкања на плоча, до мелодични лупови и грувови - доволно квалитетни и применливи во речиси секаква ситуација. Наместо да ринете по гадни „warez“ сајтови преземајќи колекции семплови што не се бесплатни, преземете нешто по ваш вкус од колекцијата од над 30.000 бесплатни (читај квалитетни) звуци. Патем, ѕирнете ја мојата скромна колекција од десеттина интересни семплови.

CreativeBinge e многу нов веб сервис за графички и веб дизајнери. Овозможува создравање единствено портфолио за секој уметник, има одличен интерфејс, ептен е кориснички ориентиран и како сервис му е препорачан на секој фриленсер од нашава државичка. Моето портфолио е овде.

StockExpert е бесплатен сервис за продажба на royalty-free слики и фотографии. Потребна е регистрација како StockExplert уметник и штом истата е одобрена, продажбата е возможна. Нормално има правила кои мора да се почитуваат, па не може да ставите штогоде на продажба и многу важно сè што продавате на StockExpert мора да е во ваша лична сопственост. Испалата на заработеното се врши преку PayPal или во вид на специјални чекови. Сличен сервис на овој е Fotolia, но лично не сум задоволен од него, па го препорачувам StockExpert.

musikCube e ултра стабилен аудио медија плеер, што користи страшно малку RAM (1-4MB) и совршен е за постари машини. Поддржува сè што е денес популарно од аудио кодеци (mp3, ogg, wav, flac итн.), прави претопи од песна во песна, нуди екстра ефикасен пребарувач и рандомизатор, дозволува тагување, рангирање и уште многу, многу други корисни зафрканции. А инаку се базира на open source проектот musik.

Ја користам верзијата 1.0 и не сум се сретнал со некои страшни проблеми, но има работи заради кои корисниците се жалат.