Со објавувањето на верзијата 3.6, во Firefox беше овозможено забрзано лизгање низ веб-страниците без потреба од дополнителни додатоци.

Што всушност значи ова? Едноставно кажано, Firefox стана осетлив на брзината со која се врти тркалцето на глувчето. Уште поедноставно кажано, ако го вртите тркалцето бавно и лизгањето низ страницата ќе биде бавно, но ако го вртите тркалцето многу брзо, лизгањето ќе биде забрзано до тој степен, што би се добил привид дека всушност брзината на вртење на тркалцето и брзината на лизгање низ страницата се исти.

Постојат две вредности од регистарот на Firefox со кои забрзаното лизгање може да се прилагоди до совршенство.

mousewheel.acceleration.start

Со ова вредност се одредува после колку вртења на тркалцето на глувчето, Firefox ќе започне да го забрзува лизгањето низ страницата. Така, ако „mousewheel.acceleration.start“ има вредност „2“, тоа значи дека забрзаното лизгање би почнало после второто последователно завртување на тркалцето на глувчето.

mousewheel.acceleration.factor

Со оваа вредност се дефинира степенот на забрзување на лизгањето или поедноставно кажано силата со која би го турнале Firefox по должината на веб-страницата. Мојот Firefox го забрзува лизгањето со фактор 20. За поедноставно да ја разберете улогата на оваа вредност, активирајте го мазното лизгање во Firefox (Preferences -> Advanced -> Use smooth scrolling) и поиграјте си со нeјзината големина.

Стандардно, измени во регистарот на Firefox можете да правите со повикување на „about:config“ од адресната линија.

Промените на вредностите за забрзано лизгање се истовремени, што значи дека не треба да го рестартирате Firefox за да го видите нивниот ефект.

Сепак, за мене, многу поисплатливо е на своја рака да променам неколку клучеви во регистарот на Firefox, отколку да ја проширувам листата на додатоци. Секој додаток си има сопствена „тежина“, која се одразува на целокупната работа на прелистувачот. Тоа особено се чувствува кај додатоците со големина од над 100KB.

Еве неколку функционалности на Firefox, за кои поедноставно е да не користите додатоци.

• Резултати од пребарување во нов таб

  browser.search.openintab – true

• Копче за затворање на таб

  browser.tabs.closeButtons

  • 0 – копче за затворање на активен таб
  • 1 – копче за затворање на сите табови (основно поставување)
  • 2 – табови без копчиња за затворање
  • 3 – едно копче за затворање на крајот на листата со табови (како во Firefox 1.x)
• Листа на отворени табови со слики од табови
  • browser.allTabs.previews – true
  • browser.ctrlTab.previews – true
• Почеток на преземање без прикажување на менаџер за преземање

  browser.download.manager.showWhenStarting – false

• Успешно преземање без известување од менаџер за преземање

  browser.download.manager.showAlertOnComplete – false

• „Paste“ со клик на средното копче на глувчето

  middlemouse.paste – true (основно поставување во Linux/Unix)

• Забрзано лизгање низ веб-страниците
  • mousewheel.acceleration.start – 2
  • mousewheel.acceleration.factor – 30

Посочените вредности се составен дел на регистарот на Firefox, кој може да се отвори со внесување „about:config“ во адресната лента.

2007 Microsoft Office system – додаток на Microsoft Office 2007; овозможува преглед на Office документи директно во Firefox… што би му дошло исто како кога директно во Firefox се прегледува PDF документ.

Google Earth Plugin – додаток на Google Earth; овозможува користење на Google Earth директно во Firefox.

Google Update – додаток на Google Chrome; овозможува поедноставна инсталација на Chrome од Firefox, на тој начин што директно ги презема сите потребни датотеки пред почетокот на инсталацијата или надградбата на Chrome, без притоа да бара одобрување од корисникот.

Microsoft DRM (DRM Netscape Network Object и DRM Store Netscape Plugin) – додатоци на Windows Media Player; овозможуваат преслушување или пак купување на аудио и видео записи – заштитени со DRM; овој елемент не се однесува на репродукцијата на сите аудио и видео записи за кои се користи Windows Media Player.

Mozilla Default Plug-in – додаток на Mozilla Firefox; се користи кога на корисникот му недостасува некој од основните додатоци за Firefox и кога корисникот треба да биде предупреден на тоа.

Picasa – додаток на Google Picasa; се користи за размена на податоци помеѓу десктоп апликацијата и Picasa Web Albums преку Firefox; би требало да го доближи користењето на Picasa Web Albums со користењето на десктоп апликацијата.

Windows Media Player Plug-in Dynamic Link Library – додаток на Windows Media Player; се користи за прикажување на вгнездени (embedded) Windows Media содржини, и за аудио и за видео записи; доколку е оневозможен, на местото кадешто треба да биде прикажана вгнездената содржина ќе биде прикажано следново предупредување: „The plugin for this content has been disabled. Click here to manage your plugins.“.

Windows Presentation Foundation – додаток на Microsoft WPF; Mozilla и Microsoft препорачуваат да биде оневозможен, поради тоа што го загрозува користењето на Firefox; од неодамна се наоѓа на листата на блокирани додатоци за Firefox, на што Firefox од верзијата 3.5.3 предупредува автоматски; ако сакате, можете и да го избришете.

Останатите додатоци припаѓаат на листата на основни додатоци за Firefox, па доколку ве интересира, повеќе прочитајте на страницата на Mozilla.

Се надевам дека овие информации ќе ви бидат од помош.

Патем, IT.com.mk треба под итно да поработат на оптимизацијата на сопствениот веб сајт. Ми се закочи Firefox…

Основната идеја на безбедниот режим е да овозможи користење на Mozilla Firefox без активни додатоци од било кој тип. Дополнително, преку стартувањето во безбедниот режим, овозможено е враќање на основните преференци на Mozilla Firefox. Оваа можност е многу практична кога сакате да направите целосно ресетирање на Firefox и да го вратите во основниот облик, во кој ви бил оригинално испорачан.

За целосно ресетирање, стартувајте го Firefox во „безбеден режим“ и означете ги сите достапни опции (прикажани на сликата погоре). На крајот, изберете „Направи ги промените и рестартирај“ (оригинално – „Make changes and Restart“). Со тоа успешно сте го вратиле Firefox на основата. Направените измени се неповратни, па пред да ги извршите размислете дали се навистина потребни.

Во продолжение, еве и кратко објаснување за секоја од достапните опции, во рамките на прозорецот за стартување во безбеден режим.

• Оневозможи ги сите додатоци – Доколку ја означите оваа опција и изберете „Направи ги промените и рестартирај“, Firefox ќе се стартува во нормалниот режим на работа и притоа сите инсталирани додатоци ќе бидат исклучени (но не и избришани).
• Ресетирај ги алатниците и контролите – Доколку ја означите оваа опција и изберете „Направи ги промените и рестартирај“, Firefox ќе се стартува во нормалниот режим на работа и притоа, сите промени на алатниците (големина на контроли (копчиња), позиција на контроли итн.) ќе бидат поништени.
• Врати ги обележувачите на основните обележувачи на Firefox - Доколку ја означите оваа опција и изберете „Направи ги промените и рестартирај“, Firefox ќе се стартува во нормалниот режим на работа и притоа, ќе бидат избришани сите дополнителни обележувачи, a ќе бидат вратени основните на Firefox.
• Врати ги сите кориснички преференци на основните преференци на Firefox - Доколку ја означите оваа опција и изберете „Направи ги промените и рестартирај“, Firefox ќе се стартува во нормалниот режим на работа и притоа сите преференци во Firefox, ќе бидат вратени на основните вредности.
• Врати ги оригиналните сервиси за пребарување – Доколку ја означите оваа опција и изберете „Направи ги промените и рестартирај“, Firefox ќе се стартува во нормалниот режим на работа и притоа ќе бидат вратени сите основни сервиси за пребарување што, намерно или ненамерно, сте ги избришале.

За дополнителни информации на оваа тема, погледнете го оригиналниот запис од прирачниците на Mozilla.

На крајот едно мало потсетување дека утре, на 30 јуни 2009, ќе биде објавена долго очекуваната верзија 3.5 од Mozilla Firefox.

Иницијални подготовки

Доколку не знаете што е Firefox, информирајте се веднаш на некоја од следниве врски:

• Firefox Help
• Firefox на Википедија (англиски јазик)
• Mozilla на македонски

Доколку користите постара верзија на Firefox, надградете ја со верзијата 3.

Доколку барате специјална јазична верзија од Firefox, истражете ја листата на достапни локализирани верзии.

Доколку користите екстерен менаџер за преземање, запознајте се со downThemAll!.

Доколку сте слушнале дека Firefox користи многу меморија и е многу спор прелистувач, читајте понатаму.

На почеток…

Стартувајте го Firefox и во адресната линија внесете: „about:config” (без наводници). Со тоа се повикува регистарот на Firefox преку кој е овозможено напредно менување на нагодувањата. Со користење на „about:config“, Firefox може да се направи да работи значително побрзо и поефикасно во споредба со испорачаната основна и неменувана верзија. Сепак, тоа е оставено на изборот на корисникот. Затоа и тој е предупреден пред да му биде дозволено да прави измени во регистарот.

Регистарот располага со постоечки вредности од 3 различни типови:

• целобројни вредности (integer)
• точно или неточно вредности (boolean)
• тектуални вредности (string)

Дозволено е и создавање на нови вредности од истите 3 типови. Создавањето на нова вредност е овозможено со десен клик на било кој дел од површината на регистарот и избирање на соодветната вредност од менито New.

Промените што ќе бидат опишани во продолжение опфаќаат менување на постоечки вредности од регистарот или создавање на нови вредности. Дали се работи за промена на постоечка вредност или задавање на нова е посочено во дадениот контекст за секоја од опишаните промени.

Брзина

Firefox e сериозно брз интернет прелистувач, а со следниве неколку измени тој може да ги прикажува веб страниците уште побрзо. Пронајдете ги следниве постоечки вредности во регистерот и изменете ги нивните основни вредности на следниов начин:

• “network.http.pipelining” во “true“
• “network.http.proxy.pipelining” во “true“
• “network.http.pipelining.maxrequests” во “8“
• “network.http.max-connections” во “48“
• “network.http.max-connections-per-server” во “20“
• “network.http.max-persistent-connections-per-server” во “8“

Дополнително, треба да се додаде нова вредност од тип „точно или неточно“:

• “network.http.pipelining.firstrequest” во “true“

Со овие неколку измени, значително се зголемува количеството на информации што Firefox во еден момент може да го преземе, а со тоа и директно се влијае на брзината на читање веб страници.

На брзината на исцртување на веб страници може да се влијае преку постоечката вредност „nglayout.initialpaint.delay“. Вредноста е дефинирана како цел број на милисекунди, а инаку го претставува временскиот интервал кој треба да помине за Firefox да почне со исцртување на елементите на една веб страница. Доколку оваа вредност се дефинира како 0 (нула), тогаш задоцнување нема да има. Препорачано е вредноста на „nglayout.initialpaint.delay“ да изнесува 125, за да се добие впечатокот дека Firefox одеднаш ги исцртува целосните веб страници. Задоцнувањето е само 125 милисекунди, а визуелниот ефект е значителен. Се разбира некому тоа може и да не му се допаѓа, па во таков случај препорачаната вредност е 0 (нула).

Функционалности

Со објавувањето на Firefox 3 беа воведени новини во работната околина на прелистувачот и сосема беа сменети некои од постоечките функционалности.

На пример: адресната линија се претвори во поле за пребарување низ личните обележувачи и веб страниците што се запишани во историјата на Firefox. Адресната линија во Firefox 3 доби проширена намена и популарно беше наречена „awesome bar“. Со помош на менување на вредности од регистарот на Firefox, можно е дополнително проширување на намената на адресната линија.

Ако вредноста „browser.urlbar.autofill“, што веќе постои во регистарот на Firefox, ја смениме во „true“, адресната линија автоматски ќе ги допишува адресите на веб сајтовите што сме почнале да ги испишуваме.

Понатаму, доколку сакаме адресната линија да дава повеќе предлози за веќе посетени страници и обележувачи, постоечката целобројна вредност „browser.urlbar.maxRichResults“ можеме да ја промениме со вредност што нам ни одговара. На пример, за адресната линија да дава само 5 предлози, вредноста „browser.urlbar.maxRichResults“ ја менуваме во 5.

Уште една функционалност што е деактивирана во основната верзија на Firefox и што може по потреба и по желба на корисникот да се активира, е можноста за проверка на правопис во полињата за внесување текст („layout.spellcheckDefault“ во „2“).

Меморија

И покрај тоа што најголем дел од проблемите со мемориската зафатнина на Firefox беа решени со издавањето на верзијата 3.0, сепак простор за подобрувања и понатаму има. Со следниве неколку вредности се контролира апетитот на Firefox во различни околности и значително се подобрува мемориското менаџирање при работа со голем број на табови. Следниве три постоечки вредности од регистарот се менуваат на овој начин:

• „browser.cache.disk.capacity“ во „15000“
• „network.prefetch-next“ во „false“
• „browser.sessionhistory.max_total_viewers“ во „-1“

Со претходните неколку измени го ограничуваме капацитетот (на 15 мегабајти) на податоците што Firefox ги запишува на хард дискот при прелистувањето, потоа го оневозможуваме раното вчитување на врски до моментално прелистуваната веб страница (link prefetching) и го оневозможивме чувањето во меморија на претходно прелистуваните страници во нишката. Како резултат на менувањето на вредноста „browser.sessionhistory.max_total_viewers“, можно е да има мало забавување при користењето на функционалностите „Back“ и „Forward“, но тоа е незначително во однос на поволностите што произлегуваат од извршувањето на оваа измена.

Дополнително додаваме уште две непостоечки вредности во регистарот:

• „browser.cache.memory.capacity“ во „10“
• „config.trim_on_minimize“ во „true“

Со додавањето на вредноста „browser.cache.memory.capacity“ го ограничуваме количеството RAM што Firefox ќе го користи за чување на веќе посетени веб страници. Целобројната вредност дефинира капацитет во килобајти. Во нашиов случај велиме дека Firefox нема да користи повеќе од 10 килобајти RAM за чување на веќе посетени веб страници и со тоа значително го стеснуваме просторот за подрастични промени во мемориската зафатнина на Firefox. Негативен ефект од оваа измена е намалувањето на брзината на прикажување на веќе посетени веб страници. Сепак намалувањата во брзината не се драстични. Речиси и да не се забележливи.

Со додавањето на вредноста „config.trim_on_minimize“ велиме дека секојпат кога прозорецот на Firefox ќе биде минимизиран, Firefox треба да го скрати количеството на користена меморија од RAM. Со други зборови, штом ќе го минимизираме прозорецот на Firefox, треба да биде ослободен најголем дел од меморијата што се користи кога тој е активен.

Со овие неколку измени мемориската зафатнина на Firefox се сведува на околу 80-тина мегабајти за прозорец со 6-8 отворени табови со богата содржина. Тоа е навистина одличен резултат.

За крај…

• Дали знаете дека Firefox го користат над 50% од корисниците на интернет во Македонија?
• Дали знаете дека потребна е помош при преведувањето на Firefox на македонски јазик?
• Дали знаете дека примената на Firefox уште повеќе може да се прошири со илјадниците достапни додатоци?
• Дали знаете дека со Adblock Plus можете да го оневозможите прикажувањето на реклами на веб сајтови?
• Дали знаете дека со „Tabs Open Relative“, можете значително да го скратите патот што го поминувате со покажувачот низ екранот?
• Дали знаете дека со „Video DownloadHelper“ можете да го преземете било кое видео од YouTube, DailyMotion, Vimeo и сите слични веб сајтови за поставување и прегледување на видео записи?

Доаѓа со долга листа на подобрувања и неколку долго очекувани карактеристики.

Со Pidgin 2.5 добивме:

• поддршка за офлајн пораки во MSN
• менаџер за смешковци (а со тоа и можност за додавање и употребување смешковци по избор)
• автоматско намалување на огромни смешковци (заради што Pidgin често се закочуваше или исклучуваше)
• можност за поставување лични пораки
• и уште многу други интересни опции…

Супер издание! Честитки и само напред. Ако некогаш мислев дека Pidgin се развива со намален интензитет од порано, денес мислам дека тој е повторно во игра. Силно препорачан на сите корисници, особено на оние што првпат слушаат за Pidgin, без оглед на избраната платформата.