Што е ново во Firefox 10?

Firefox 10 ќе биде релативно голема надградба или барем поголема од оние, на кои се навикнавме во изминатиот период со забрзаниот развоен циклус.

Firefox ќе воведе помалку рестриктивен пристап кон додатоците. Повеќе нема да има потреба од задолжителна надградба за секој додаток, при објавувањето на нова верзија од Firefox.

Од 10-та верзија, Firefox ќе си претпоставува дека секој додаток е веќе прилагоден да работи и на понови верзии од прелистувачот. Така, корисниците нема да бидат оневозможени да ги користат омилените додатоци и на најновите верзии од Firefox, а вината за потенцијалните проблеми ќе биде префрлена кај развивачите на додатоците.

Во Firefox 10 ќе добиеме и алатка за брзо истражување и менување на составот на веб-страниците - алатката „Inspect“, составена од „Page Inspector“ и „Style Inspector“ - како еден вид на осиромашена верзија од Firebug, со поразличен дизајн. Предноста е што „Inspect“ станува составен дел од јадрото на Firefox, со што се намалува потребата од Firebug за основните корисници.

Други дополнувања и измени:

• копчето „Forward“ станува невидливо, доколку нема следна страница кон која може да се насочите;
• поддршка за anti-aliasing за WebGL;
• подобрена поддршка за IndexedDB;
• поддршка за веб-апликации што би работеле на цел екран;
• поддршка за 3D-трансформации преку CSS3;
• поддршка за елементот за двострано ограничување на текст;
• подобрувања на Firefox Sync;
• и така натаму.

Што е ново во Thunderbird 10?

Новата, 10-та верзија на Thunderbird, доаѓа со многу помали измени и дополнувања, но сепак се 130+.

Сосема нова ќе биде можноста за пребарување на Интернет директно од Thunderbird, а подобрувања можат да се очекуваат во функционалноста за пребарување низ пораките и менаџирањето на нацрти (drafts).

Честитки за уште две успешни изданија на целокупната заедница на Mozilla!

Преземено од Mozilla на македонски.

Постојат два одговори на ова прашање. Едниот е едноставен за основните корисници, другиот за понапредните.

Одговор за основни корисници

1. Кликнете на копчето „Firefox“ и изберете „Troubleshooting Information“ – „Информации за проблеми“ во Firefox на македонски. Доколку немате копче „Firefox“, опцијата „Troubleshooting Information“ ќе ја најдете во менито „Help“.

Пристапување до about:support или „Troubleshooting Information“ во Firefox 9.0.1

Ќе Ви се отвори нов таб со листа на корисни информации, меѓу кои се наоѓа и табела со информации за постоечките додатоци во Вашиот кориснички профил во Firefox.

about:support во Firefox 9.0.1

2. За да ја зачувате оваа страница во некој вообичаен формат, кликнете на копчето „Firefox“ и изберете „Save Page As...“ – „Сними ја страницата како...“ во Firefox на македонски.

3. Дополнително, изберете дали ќе запишете веб-страница или текстуална датотека на Вашиот диск.

Снимање на датотека во Firefox 9.0.1

Одговор за напредни корисници

Отворете нов таб и во адресната лента внесете „about:support“.

Пристапување до about:support во Firefox 9.0.1

Потоа самите одлучете што ќе правите со овие информации или пак погледнете ги чекорите 2. и 3. во Одговор за основни корисници.

Оваа верзија е особено интересна, зашто решава неколку клучни проблеми поврзани со меморискиот менаџмент во Firefox. Firefox 7 ќе троши до 50% помалку меморија! Понатаму, подобрувања ќе можат да се забележат и во брзината на прикажување на елементот canvas на оперативниот систем Windows.

CC Attribution, Goce Mitevski

Firefox 7 ќе се синхонизира речиси инстантно на сите платформи, што не беше случај досега, а ново ќе биде и тоа што Firefox 7 ќе може да испраќа информации поврзани со брзината на работа до Mozilla и така да придонесе кон подобри идни верзии. Се разбира, испраќањето на тие информации ќе биде со одобрување на корисникот.

Една, за мене, незначителна новина е тоа што, по примерот на Google Chrome и Firefox 7 нема да ја прикажува ознаката на протоколот HTTP (http://) од адресната лента.

Нова ќе биде и поддршката за елементот „text-overflow: ellipsis“, кој е инаку составен дел од спецификацијата за CSS3.

Ако имате време и ве интересира, погледнете ја целосната листа на измени во ова издание. Таа опфаќа 1242 поправки, што никако не е за потценување.

Firefox 7 ќе биде објавен во вторник, во 16 часот по локално време и како и досега, ќе биде достапен и на македонски јазик.

Каков мемориски-менаџмент?

Епа, од четвртата верзија па наваму, Firefox е способен самиот да одлучи кои табови ќе ги чува во меморија, а кои ќе ги отстрани. Со секоја наредна верзија оваа способност бележи подобрувања. Но, да не добиете впечаток дека зборувам за некаков збир од можности, врз кои корисникот нема директна контрола, ќе го спомнам следниов клуч: „browser.sessionstore.max_concurrent_tabs“.

Отворете го регистарот на Firefox, преку about:config од адресната линија, и внесете го името на клучот. Променете ја неговата вредност во нула и рестартирајте го Firefox. Ќе забележите значително подобрување во однос на целокупната брзина на работа на прелистувачот, а еве и зошто.

Со клучот „browser.sessionstore.max_concurrent_tabs“ се одредува колку неактивни табови во даден момент ќе бидат вчитани во меморија. Што значи тоа? Да речеме дека во Firefox имате отворено 20 табови. Од нив само 4 ги користите во тековната сесија. Ако вредноста на „browser.sessionstore.max_concurrent_tabs“ ја промените на нула, после извесно време, Firefox самиот ќе ги отстрани „задреманите“ табови од меморија. Исто така, доколку го рестартирате Firefox ќе забележите дека, заради промената на овој клуч, по рестартирањето ќе се вчита само активниот таб, а другите ќе останат замрзнати додека не ги кликнете. На тој начин се штеди меморија и Firefox работи поефикасно.

Пред да помислите дека ова е уште еден очаен обид да се постигне брзината на Google Chrome во Firefox, ве охрабрувам да ја промените вредноста на „browser.sessionstore.max_concurrent_tabs“ и самите да се уверите во придобивките.

Клучот е: nglayout.enable_drag_images! Може да се промени од регистарот на Firefox. До регистарот се пристапува, со внесување на „about:config“ во адресната лента и со притискање на Enter.

ПРЕД: При влечење на таб, Firefox автоматски создава лебдечки приказ на влечениот таб

Доколку ја поставите вредноста на nglayout.enable_drag_images на false, Firefox повеќе нема да создава лебдечка сликичка од табот што го влечете и единствено ќе прикаже мала стрелка кон нагоре, означувајќи ја позицијата, на која би го поставиле табот што го влечете.

ПОТОА: Firefox не прикажува лебдечки приказ на влечениот таб

Ова е уште еден начин да го натерате Firefox да работи побрзо и помазно.

Лично сметам дека Firefox треба да вклучува можност за прилагодување на замазнувањето (anti-aliasing) на текстот „out of the box“, а не за тоа да треба да се користат дополнителни додатоци. Но, што е, тука е...

Аnti-aliasing Тuner во Firefox 5 на Windows 7

Најдов еден додаток што овозможува брзо и едноставно прилагодување на типот и интензитетот на замазнување на текстот во Firefox. Додатокот се вика „Anti-aliasing Tuner“ и ви препорачувам да го активирате, доколку гледате заматен или нејасен текст во Firefox на Windows 7 или Windows Vista. Додатоков работи само на Windows.

Кликнете на сликата, ако сакате да ги видите моите поставувања.

Ваквото однесување на Firefox е предвидено со неговата изработка и овозможува побрзо отворање на веќе посетените веб-сајтови, така што тие ќе се вчитуваат директно од системската меморија, а не од од хард диск. Сепак, доколку немате вишок системска меморија, оваа „можност“ на Firefox, повеќе прави штета отколку што помага.

Како и секогаш, кога правите напредни прилагодувања во Firefox, така и сега, отворете го регистарот со повикување на „about:config“, преку адресната лента.

Најдете го клучот: browser.sessionhistory.max_entries, и променете ја неговата вредност од 50, на вредност, што вам најмногу ви одговара. Ако сакате Firefox да ги чува во меморија содржините од последните 6 посетени веб-сајтови, внесете: „6“, па, рестартирајте го Firefox.

Разликата, би требало да е забележлива веднаш.

Претходни записи на оваа тема:

• Што да направите ако Firefox (сѐ уште) ви троши многу меморија?
• Како да го доведете Firefox до совршенство?

Додатоците за Firefox најчесто оставаат траги во регистарот и по нивното бришење. Тоа се прави, за да се запомнат корисничките прилагодувања, па во случај додатокот во иднина да е реактивиран, истите да бидат прочитани, без да има потреба да се поставуваат отпочеток.

Приказ на eCleaner 1.0

eCleaner е релативно нов додаток за Firefox, што автоматски ги пронаоѓа сите клучеви што ги имаат запишано додатоците во Firefox. Со тоа ви дозволува, со само еден клик да ги отстраните сите траги што ги оставил одреден додаток. Многу корисно!

Единствената забелешка што ја имам е што, eCleaner сè уште не може да ги прикаже само клучевите од избришаните додатоци.

browser.cache.memory.capacity

Отворете го регистарот на Firefox со повикување на „about:config“ (без наводници), преку лентата за внесување адреси. Потоа, потврдете дека ќе бидете внимателни со измените.

Со десното копче на глувчето, кликнете на било кој од постоечките клучеви и изберете „New“ и потоа „Integer“. Името на новиот клуч треба да биде „browser.cache.memory.capacity“ (без наводници), а неговата вредност „-1“ (без наводници).

Со додавањето на овој клуч, вие му кажавте на Firefox дека сакате автоматски да одредува колку меморија ќе троши за чување на елементи од веќе вчитаните веб страници. Спротивно на тоа, доколку не сакате Firefox да ги чува во меморија овие елементи, наместо „-1“, за овој клуч треба да поставите вредност „0“ и тогаш Firefox повеќе ќе запишува на системскиот хард диск.

Со помош на „browser.cache.memory.capacity“, Firefox ќе ви работи побрзо и ќе биде многу поефикасен во ослободувањето на деловите од системската меморија што ги има зафатено, а инаку не ги користи.

Видете ги и фотографиите на Новицa, како и оние на Мозила Македонија.