Населението од повисоките делови на Радишани (во кое спаѓам и јас), со години има проблем со водоснабдувањето, во текот на пролетните и летните месеци од годината.
Штом ќе „пукне“ сонце, населението од подолните делови на населбата, добива речиси континуиран нагон да си игра со водата за пиење со која располага. Се вадат ниви, се мијат дворови, се мијат дури и улици. За сметка на тоа, горно Радишани има драстично намален притисок, а понекогаш е толку намален што е речиси невозможно да се тушираш. Водата, тенка како врвка, едвај тече и низ чешмата, па нема многу сила да истрае до „главата“ на тушот.
Фото: Дневник
Неофицијално, некој се сетил на овој наш проблем, баш за време на предизборието на парламентарните избори 2011. Исто така неофицијално, проблемот бил наводно откриен и се должел на нерамномерна распределба на притисокот на водотекот во различни делови од Радишани. Така, горно Радишани имало притисок 2, а долно Радишани – притисок 11! И затоа, постојано пукале цевки.
За среќа, сега кога проблемот е откриен, тој ќе бил решен во наредниве неколку недели.
Штом дошле на ред проблемите во Радишани, тогаш или сè друго е навистина реализирано или некому очајно му требаат прилики за сечење црвени ленти и прилики за јавни настапи. Punk’d!
