На Скопје 2011 – фестивалот на кој Македонија го избра својот евровизиски претставник, на Драган Ѓаконовски – Шпато, постхумно му беше доделена Награда за посебен придонес и ангажман. Но, тоа беше направено толку мизерно, што едноставно ќе беше подобро никој да не го спомнеше Шпато, во контекстот на циркузот на фестивалот.
Оливер го спомнува Шпато и ја соопштува одлуката за наградата… се чека некој да ја подигне наградата… доаѓа тој што ќе ја подигне наградата и во меѓувреме екстра талентираната водителка, не знам како успева да ги натемпира работите, но, точно во моментот кога треба да се поздрави со аплауз наградата за Шпато, го спомнува името на Тоше Проески… па следува аплауз, но не се знае за кого и за што… па потоа, човекот што ја подига наградата за Шпато, некако културно е набркан од сцената и се продолжува со разговор за ангели – бљак.
Драган Ѓаконовски - Шпато
За среќа, причината заради која го пишувам записов, е поврзана со музиката на Шпато, а не со неговиот третман од македонските институции.
Пред некој месец решив да отворам онлајн директориум, којшто еден ден, се надевам, ќе стане значајна колекција со музика од овој голем македонски автор.
Доколку имате музика од Шпато, што би сакале да ја споделите, би ве замолил да оставите коментар на овој запис, за да можам дополнително да ве контактирам, музиката да биде поставена во директориумот и да стане достапна за сите.