Бизнис на македонски начин со „Message“

Работењето со маркетинг-агенции има свои предности и маани. Една од предностите е дека, како самостоен дизајнер, вие нема да треба да се грижите за комуникацијата со крајниот клиент и дека тоа ќе ѝ биде препуштено на самата агенција. Таа ќе се јави во улога на посредувач помеѓу вас, како извршител на сегмент од проектот или пак, на целиот проект и крајниот клиент, како купувач на производот. Ваквото посредување, колку што е предност, толку е и маана, доколку работите тргнат наопаку. А, наопаку, ќе тргнат каде ако не во Македонија.

Овој запис слободно можете да го означите (читајте тагувате) со „clients from hell“.

Самостојните дизајнери во нашата земја се редок вид, а верувам дека однесувањето на маркетинг-агенциите има голем удел во тоа. Човек треба да има челични нерви, да е лудачки претпазлив и да е многу упорен, доколку сака да опстои на „пазарот“ со нејасно дефинирани правила на игра… пазар, на којшто ретко кој знае што купува или пак што продава. Ваша среќа е ако соработувате со маркетинг-агенции, за коишто не е својствен претходниот опис.

Неодамна имав непријатно искуство со Message – мала маркетинг-агенција од Скопје.

Имам пракса, за секој започнат проект, да барам исплата, во две етапи – првата пред започнувањето и втората по завршувањето на проектот. Со авансната исплата се осигурувам дека клиентот е сериозен во својата дејност и се мотивирам, за целосно да се вложам во проектот.

Message ми беа специфични клиенти, по тоа што за нив правев отстапка во начинот на наплатување за мојот ангажман, бидејќи не беа во можност да ме исплаќаат авансно. Со Message досега имаме соработувано на неколку проекти.

Последниов пат, соработката се оствари со цел да се изработи визуелен идентитет за „Центар за обука на пилоти“ (на хеликоптери) – за потребите на Министерството за одбрана и Министерството за внатрешни работи на Република Македонија. Прва етапа, требаше да биде изработката на лого.

Проектот ми беше презентиран како сериозен, а рокот за завршување како многу краток. Излегов со прецизна понуда и рок од 10 дена за завршување на проектот. За околу 4 дена, понудив три речиси финални решенија, за петтиот ден на барање на Message да понудам уште еден дополнителен дизајн.

Понудените дизајни можете да ги видите на сликата подолу.

centar-obuka-piloti-message-mvr-mon

Соработката се одвиваше без проблеми, сè до моментот кога Message ги понуди дизајните на крајниот клиент. Дизајните наишле на неочекувано лош прием од клиентите.

По првиот состанок на Message со крајните клиенти, ми беше навестено дека постои можност Message да се откаже од проектот, со напомена дека, без оглед на тоа, мојот ангажман ќе биде исплатен. Исто така, бев прашан дали сум сигурен во квалитетот на понудените дизајни и дали сум ослободен од сомнежи дека, сепак можело да се понудат подобри решенија. Одговорив дека во квалитетот сум сигурен и дека стојам зад понудените дизајни. Ова беше првпат, кога помислив дека комуникацијата почнува да станува сомнителна.

По вториот состанок, стана сосема јасно дека Message се откажува од проектот (затоа што крајните клиенти имале нејасно дефинирани очекувања и им држеле лекции по дизајн), како и дека, и мојот ангажман ќе мора да запре. Со тоа, спорни станаа две работи:

  • јас да бидам исплатен;
  • во колкав процент проектот може да се смета за завршен, па соодветно на тоа и да бидам исплатен;

Откако во телефонски разговор објаснив, зошто сметам дека треба да бидам исплатен за сработеното (иако во нормални околности, сметам дека, од тоа нема потреба) и успеав усно да се договорам да ми бидат исплатени 50% од вкупната цена на ангажманот, наидов на обид за манипулација со бруто/нето износи. Откако тоа го расчистивме, повторно спорен стана процентот во којшто треба да бидам исплатен за ангажманот. Моите 50%, за првомајските празници се претворија во 30% и комуникацијата во целост излезе од контрола.

На крајот донесов одлука да не ја прифаќам исплатата од 30% и да го напишам овој запис. На Message им напоменав дека за случката ќе ги разбере пошироката јавност.

Останува дополнително да одлучам дали ќе преземам некакви правни активности против Message.

На крајот, поуки за самостојни дизајнери:

  • не работете за маркетинг-агенции што не исплаќаат авансно во определен процент;
  • не работете за маркетинг-агенции што не покажуваат разбирање за вашите потреби;
  • не работете на проекти за коишто немате писмени договори; компаниите што нема да сакаат да склучат писмени договори, имаат потенцијал да станат „clients from hell“;
  • не плашете се јавно да ги откриете маркетинг-агенциите што ви нанеле штета или пак постапиле непрофесионално со вас; ако треба, специјално отворете блог за тоа;
  • не плашете се да одбиете соработка со сомнителни агенции, дури и во случај, очајно да ви требаат пари;
  • не работете со Message.

Звук на преден приклучок за слушалки во Ubuntu

После неколку-месечно малтретирање со предниот приклучок за слушалки, поради тоа што не ми работеше во Ubuntu (знае Дамјан), конечно имам добри вести! :)

Проблемот го решив со една линија код во /etc/modprobe.d/alsa-base.conf:

options snd-hda-intel model=ref-no-jd

За да успеам да разберам во што би можел да се состои проблемот, се послужив со официјалното упатство од Ubuntu. Потоа ги тестирав една по една опциите за мојата звучна картичка:

STAC9227/9228/9229/927x
=======================
  ref		Reference board
  ref-no-jd	Reference board without HP/Mic jack detection
  3stack	D965 3stack
  5stack	D965 5stack + SPDIF
  5stack-no-fp	D965 5stack without front panel
  dell-3stack	Dell Dimension E520
  dell-bios	Fixes with Dell BIOS setup
  volknob	Fixes with volume-knob widget 0x24
  auto		BIOS setup (default)

За тие што можеби сѐ уште имаат проблеми од овој тип, еве еден совет за поефикасно тестирање.

За да ја освежите конфигурацијата на драјверите за звучната картичка, нема потреба да го рестартирате компјутерот. Сѐ што треба да направите, е да ја превчитате ALSA, со помош на следнава команда:

sudo alsa force-reload

И тоа е сѐ! Ќе го постигнете истиот ефект од рестартирањето на компјутерот.

Ако некој има прашања на оваа тема, слободно нека ги постави. Можеби ќе можам да ги одговорам, иако имам релативно скромни познавања на темава.

М’рсул на сликање

Комуникација во МВР

Тууу… што народ! :/

Одам да се сликам за лична карта, седнувам на столчето за сликање, случајно допирам еден страничен дел од столчето и верувале или не закачувам на нечиј ТАЗЕ ИЗВАДЕН, СÈ УШТЕ ВЛАЖЕН, М’РСУЛ!

Како најчесто се создава гужва во скопскиот сообраќај?

Колку повеќе се зголемува бројот на возилата во Скопје, толку потешко станува движењето низ градот со автомобил. За да бидат работите уште понеподносливи, огромен дел од возачите и самите ги отежнуваат околностите во кои се одвива сообраќајот, непочитувајќи ги сообраќајните правила, на коишто инаку се согласиле во моментот кога ја земале својата возачка дозвола.

Сообраќајна гужва

Фото: S. S. Kumar

Еве кои се, според мене, најчестите начини на коишто се создава гужва во сообраќајот низ Скопје.

Јавен превоз

Колку што знам, возилата од јавниот превоз (како и возилата на прва помош, возилата на полиција, возилата на противпожарната служба) спаѓаат во посебна категорија на привилегирани возила, на коишто би требало да им се даде предност во движењето. Но, тоа во Скопје не се случува. Ретко кој ги „рецка“ автобусите на ЈСП, како и оние приватните. Ретко кој запира, за да им овозможи да се приклучат во сообраќајот, после нивното застанување.

Кога би биле малку повнимателни кон овие возила, многу би го подобриле текот на сообраќајот и би ги скратиле паузите, со кои тој се одвива.

Несовесно управување со возилото без користење на трепкачи

Трепкачите служат за, на останатите учесници од сообраќајот, да им навестите во која насока планирате да продолжите да се движите, за тие пак соодветно да го прилагодат нивното движење. Кога се движите во пресрет на споредна уличка, кон која планирате да завртите, „дајте жмигавец“, за другите да знаат што имате намера да направите следно. Вашето движење е јавно и нема зошто да не најавите дека планирате да се исклучите од главна улица и да продолжите да се движите по споредна. Плус, со давањето „жмигавец“, помагате околното движење да се адаптира на вас со време, а не во последниот момент.

Давањето „жмигавец“ сфатете го како кажување „благодарам“, „здраво“, „чао“… толку е неопходно!

Давајте „жмигавец“ кога претекнувате, кога преминувате од една сообраќајна лента во друга, кога застанувате… давајте „жмигавец“ секој пат кога, тоа го налагаат сообраќајните правила.

Претекнување од десно

Ова, мислам дека е најчестата причина за малите сообраќајни незгоди низ Скопје. Не знам кој го измисли, ама ова „правило“ е погрешно. Возилата се претекнуваат или ако сакате „претицаат“ од нивната лева страна.

Неприфатливо е да го заобиколите движењето на автомобилот до вас, од десно. Зошто? Зашто тоа е во спротивност со нашите сообраќајни правила, а меѓу другото, делува вознемирувачки за возачот во автомобилот до вас. Доколку вашето движење е доволно „возбудливо“, може соседниот возач да го натера на изненадни, несоодветни движења, што пак може да бидат предизвикувачи на сообраќајни незгоди.

Аман, „претицајте“ од лево!

Пешаци, насекаде!

Пешаците би требало да ги преминуваат сообраќајниците на специјално означени зони, а не каде што ќе им текне. Зоните се измислени за да се зголеми безбедноста при движењето на пешаците на фреквентните места. Возачите знаат дека треба да внимаваат кога ќе се доближат до означените зони за пешаци, а пешаците знаат дека слободно можат да ја преминат сообраќајницата на тие зони.

Нема „ми се брза“, нема „немам време“, нема „ме мрзи“!

Ако сакате да видите како изгледа кога ова правило не се почитува, застанете 5 минути на Бит пазар и сè ќе ви стане јасно. Луѓе, како спобудалени трчаат на сите страни. Прескокнуваат тревници, разговараат на сред сообраќајница, се спремаат да скокнат од страничните садници, маневрираат со велосипеди… лудило!

Непочитување на сообраќајните знаци и правила

Ова е само надоврзување на проблемот со трепкачите.

Ако сакаш да учествуваш во сообраќај, мора да ги знаеш правилата на игра. За да играш „кантер“, мора да ги знаеш соодветните контроли… која кога треба да ја активираш… Епа, така е и во сообраќајот.

  • Ја прилагодуваш брзината на соодветните сообраќајни знаци за ограничување на брзината на движење.
  • Не запираш на места на коишто е забрането запирањето.
  • Не паркираш на места на коишто е забрането паркирањето.
  • Не вртиш полукружно на двојна полна линија, зашто тоа би му дошло исто како да вртиш полукружно низ ѕид.
  • Не „претицаш“ каде што „претицањето“ не е дозволено.
  • Не возиш лудачки, по сообраќајница на која често има пешачки зони.

Веспи, чопери и останати „фраери“

Не се глупирајте и „берете умот“! И за оваа категорија на возила има сообраќајни правила. Научете ги!

Општа нетрпеливост и нервоза

Ова веројатно се должи на сè што наведов претходно.

Знам дека најчесто е полесно да опцуеш некој на сообраќајница, отколку да му се спротивставиш на шефот, ама дајте луѓе олабавете се! Никој не ви е крив што сте се успале утрово, па ви се брза, ви се ита! Никој не е виновен што не смета дека треба да тргне за време на жолтото светло на семафорот, зашто, ако не сте знаеле, се тргнува на зелено… Никој не сака да ги „крка“ вашите „бедови“.

На сообраќајница сме, за да се возиме и за да ја славиме „играта“ – сообраќај – што самите сме ја измислиле. Па, ајде да си играме.