Паблишер

Инспириран од тоа што Наум Спасески го направи за редизајнираниот македонски Интернет пребарувач Borg.mk, решив да истражам малку подетално, како всушност може да се направи додаток за пребарување низ било кој веб-сајт, што ќе работи во Mozilla Firefox, Internet Explorer и Google Chrome.

Никако не очекував дека ќе наидам на толку едноставна процедура. Mozilla да ти имала изработено посебен стандарден формат за споделување на резултати од пребарување, наречен ОpenSearch. На мое големо изненадување, поддршка за OpenSearch (иако ограничена) има и во Internet Explorer, почнувајќи од верзијата 7. Но, да не го брзам текстов, одиме по ред.

Предноста од користењето на пребарувачки додаток се состои во тоа што, корисникот не мора да го посетува веб-сајтот, низ чиишто содржини сака да пребарува.

Стандардот OpenSearch

OpenSearch овозможува, на Интернет прелистувачите да им се даде до знаење дека прегледуваниот веб-сајт дозволува пребарување низ достапните содржини директно од прелистувачот. Потребните параметри се наведуваат во датотека од тип xml и потоа откако истата e поставена на веб-серверот, се „врзува“ на заглавието на веб-страницата, со вметнување на посебен HTML таг <link />.

Во продолжение следуваат два примери. Едниот за создавање на едноставна, а другиот за детална имплементација на OpenSearch. Примерите се преземени од четвртата работна верзија на официјалниот спецификациски документ за OpenSearch 1.1.

Примерите се доволно јасни, така што нема да наведувам подетални описи за специфичните параметри.

Едноставен пример за OpenSearch

<?xml version="1.0" encoding="UTF-8"?>
<OpenSearchDescription xmlns="http://a9.com/-/spec/opensearch/1.1/">
 <ShortName>Web Search</ShortName>
 <Description>Use Example.com to search the Web.</Description>
 <Tags>example web</Tags>
 <Contact>admin@example.com</Contact>
 <Url type="application/rss+xml"
 template="http://example.com/?q={searchTerms}&amp;pw={startPage?}&amp;format=rss"/>
</OpenSearchDescription>

Детален пример за OpenSearch

<?xml version="1.0" encoding="UTF-8"?>
<OpenSearchDescription xmlns="http://a9.com/-/spec/opensearch/1.1/">
 <ShortName>Web Search</ShortName>
 <Description>Use Example.com to search the Web.</Description>
 <Tags>example web</Tags>
 <Contact>admin@example.com</Contact>
 <Url type="application/atom+xml"
 template="http://example.com/?q={searchTerms}&amp;pw={startPage?}&amp;format=atom"/>
 <Url type="application/rss+xml"
 template="http://example.com/?q={searchTerms}&amp;pw={startPage?}&amp;format=rss"/>
 <Url type="text/html"
 template="http://example.com/?q={searchTerms}&amp;pw={startPage?}"/>
 <LongName>Example.com Web Search</LongName>
 <Image height="64" width="64" type="image/png">http://example.com/websearch.png</Image>
 <Image height="16" width="16" type="image/vnd.microsoft.icon">http://example.com/websearch.ico</Image>
 <Query role="example" searchTerms="cat" />
 <Developer>Example.com Development Team</Developer>
 <Attribution>
 Search data Copyright 2005, Example.com, Inc., All Rights Reserved
 </Attribution>
 <SyndicationRight>open</SyndicationRight>
 <AdultContent>false</AdultContent>
 <Language>en-us</Language>
 <OutputEncoding>UTF-8</OutputEncoding>
 <InputEncoding>UTF-8</InputEncoding>
</OpenSearchDescription>

„Врвка“ за заглавие

Еве како би требало да изгледа содржината во рамките на тагот <link />.

<link rel="search" type="application/opensearchdescription+xml" title="searchTitle" href="pluginURL" />

Како се користи OpenSearch во Firefox?

Mozilla Firefox во целост го поддржува OpenSearch, па понапредните развивачи можат да имплементираат и автоматски предлози при пребарувањето.

Секој веб-сајт што нуди пребарувачки додаток преку OpenSearch, му го сигнализира тоа на Firefox, а потоа Firefox го известува корисникот, со менување на изгледот на избирачот за активен пребарувач.

Доколку кликнете на избирачот и доколку OpenSearch е успешно имплементиран, под достапните пребарувачи, би требало да биде наведена опција за додавање на пребарувачот за вашиот веб-сајт. Во рамките на текстов, користам пример со Contest Watchers.

По успешното додавање, новиот пребарувач може веднаш да се користи.

Како се користи OpenSearch во Internet Explorer?

Во Internet Explorer 7+, Интернет пребарувач се додава слично како во Firefox.

Како се користи OpenSearch во Google Chrome?

Google оди чекор понатаму, па ви дозволува да пребарувате директно од адресната линија.

Штом ќе ја внесете адресата на вашиот веб-сајт, доколку за него имате имплементирано OpenSearch, Chrome ќе ви сугерира да притиснете „Tab“ на тастатурата, за да пребарувате директно низ внесениот веб-сајт.

Дополнителни информации

Доколку покажувате особен интерес на оваа тема, ви предлагам да ги прочитате и следниве веб-страници.

• Creating OpenSearch plugins for Firefox
• OpenSearch description document

Подолго време се подготвувам да напишам нешто за логото на Стопанска Банка. Прво затоа што ми се допаѓа и второ затоа што сметам дека е навистина креативно.

Но, да бидам попрецизен… Тоа што всушност ми се допаѓа е симболот што е создаден за ова лого и начинот на којшто е дојдено до него.

На сликата подолу е претставен оригиналниот симбол од логото на Стопанска Банка.

Со внимателно набљудивање, лесно може да се заклучи дека во симболот на логото се содржани буквите „С“ и „Б“, односно попрецизно, во буквата „С“ е вметната буквата „Б“ и потоа групата од двете букви е свртена за 45 степени во спротивна насока од движењето на стрелките на часовникот. Погледнете ја сликата подолу и за кратко време ќе сфатите за што пишувам.

Дополнително, за да се прикрие очигледноста на направеното, а и за да се добие поедноставен облик, групата од буквите „С“ и „Б“ е пресечена на врвот и во подножјето и така се доаѓа до финалниот изглед.

Освен претходно наведеново, не можам да откријам некои други скриени, условно речено, пораки.

Немам информации чие дело е ова лого, па ако некој од вас знае, слободно нека наведе, оставајќи коментар.

Последниве неколку денови ми е толку напорно да следам вести и толку многу ме револтира тоа што во моментов се случува на нашата т.н. политичка сцена, што добивам силни нагони да изнапишам сè на блогов и да го претворам во пикадо за „државници“, „патриоти“ и останати големци од народните маси.

Едвај се воздржувам да направам будала од себе, емотивно и наивно носејќи еднострани заклучоци и етикетирајќи, навредувајќи, барајќи кривци, да презентирам спектакуларни откритија за природата на нештата во нашата држава.

Но, спектакл нема, а природата на нештата е мошне комплицирана, што те прави да се почувствуваш беспомошно, како мравка под стапалото на големиот човек.

Речиси и да сум сигурен дека во Македонија нема чесна политичка фигура, ниту пак индивидуалци што имаат желба да ја поведат толпата кон едно ново засолниште. Овчари има колку ти душа сака, но нас овчари не ни требаат.

Имаме мудри стопани од кои навистина може многу да се научи, но не за чесноста, правичноста и несебичноста. Нашите стопани се застарени видови – бета верзија што никогаш не дочекала свое финално издание. Но, зарем, не сме сите ние дел од бетата?

А, нечесно е некому да му ја одземеш шансата да ги искуси сите состојби на живеењето. Додека си богат, не знаеш како ќе ти биде кога ќе станеш сиромав. Додека си среќен не ти е многу важно што милиони други луѓе се несреќни. Кога почнуваат да ти се укажуваат шанси во животот, не си свесен дека всушност нив самиот ги создаваш. Кога напорно работиш за други и тоа е измачувачки, тешко разбирливо е дека маката всушност доаѓа одвнатре, од мислите на човекот на кој не му се работи и не му се создава, туку, му се троши.

Мене политиката очигледно ме мачи, затоа што не ја разбирам. Не разбирам како еден лидер може да се чувствува моќен, кога си поигрува со судбината на другите, кога најмалку што треба да чувствува е несигурност, поради огромната одговорност што му е дадена. Не разбирам ни како желбата да се остане засекогаш запаметен, може да се манифестира преку поставување камени и метални предмети наоколу. Воопшто не ја разбирам потребата да се идентификувам со симболи, чкртки и пароли. Но, веројатно од сите овие работи човек има потреба кога ја губи сигурноста во првичната идеја.

Врти сучи, пак се сведов на тоа од што на почетокот на овој запис се воздржував. Изгледа требаше да завршам некаде после „стапалото на големиот човек“. :)