Паблишер

Доколку некогаш имате потреба од туристички аранжмани за Египет, во никој случај немојте да помислите на туристичката агенција „Фибула“. Не верувам дека состојбата во останатите туристички агенции во Македонија е драстично поразлична, но бидејќи услугите на „Фибула“ лично ги искусив, за нив и ќе пишувам.

Што може да ви понуди „Фибула“?

• лаги;
• недоречености;
• празни ветувања;
• превисоки цени;
• необучени водичи;
• непрофесионална услуга;
• прескапи факултативни излети/посети.

Како тоа изгледа во пракса?

• сте платиле за „all inclusive“ аранжман – ве сместуваат во хотел, во кој треба да си ги плаќате пијалоците (вклучително и водата);
• сте платиле за хотел со четири ѕвезди – ве сместуваат во хотел што едвај заслужува две;
• на ден пред поаѓањето, авионскиот лет се одложува за неколку часа – со тоа наместо напладне, на туристичката дестинација, стигнувате навечер;
• вашиот туристички водич е незаинтересиран за вас – потребно е да се изложувате на дополнителни трошоци, за да стапите во контакт со него;
• редовната програма за посети на знаменитости и популарни локалитети е толку многу набиена, што се претвора во прежувување, наместо во уживање.
• вашиот туристички водич не знае да зборува македонски јазик, итн.

Никогаш повеќе со „Фибула“!

Доколку сакате да аплицирате за добивање на бугарска виза во Скопје, потребно е да закажете термин на специјалниот телефонски број 058 058 555. Аплицирањето за виза трае до 12:30 часот во текот на работниот ден. Закажувањето термин не е бесплатно и ќе ве чини 50 ден. +18% ддв, по минута разговор. Еден повик е невозможно да трае помалку од 3 минути, затоа што телефонски ви ги земаат потребните податоци. Колку што сум запознаен, истиот телефонски број служи и како инфо центар на бугарската амбасада.

Потребната документација за аплицирање, подразбира:

• апликација за добивање бугарска виза (бесплатна; се подигнува на самото место и е напишана на бугарски јазик);
• 1 слика;
• важечки пасош;
• копија од важечкиот пасош;
• копија од здравствено осигурување;
• покана од бугарска страна (доколку не одите како турист).

При надградба со најновата верзија на WordPress – верзијата 2.8.3 – ми се појави следниов проблем.

На сите целобројни вредности, поголеми од нула, им беше додадена вредноста „,000“ (без наводници). На пример: тоа што досега било 5, по надградбата се претворило во 5,000.

Претпоставувам дека во прашање е некоја глобална променлива и на неа ѝ е „залепен“ непотребен додаток, но сè уште не сум успеал да го потврдам тоа. Доколку и некој друг го има истиов проблем или пак го решил, би бил благодарен ако своето искуство го сподели, во облик на коментар, на овој запис.

ИЗМЕНА: Ок. Проблемот е дефинитивно во преводот. Штом го вратам WordPress на англиски јазик, т.е. штом ја исклучам македонската локализација сè си е во ред. Впрочем, мислам дека проблемот настанува откако ќе го активирам преводот за верзијата 2.8.3. Со преводот за верзијата 2.8.2 сè е во ред. Претпоставувам, оваа грешка настанала во брзање и се надевам дека наскоро ќе биде поправена.