Никој не ја чисти од снег улицата 1558 во Радишани

Документирам, за да остане забележано колку локалната власт во општина Бутел на чело со градоначалникот Петре Латиновски, се однесува неодговорно, кога на граѓаните им е најпотребна.

Денес решив да се јавам и да пријавам дека откако наврна последниов снег и температурите се спуштија мноoогу под нулата, на улицата 1558 во Радишани ниеднаш не е фрлено сол и таа не е исчистена од снег. Се јавив на телефонскиот број 2600-506 и по краткиот разговор со вработена во контакт-центарот на општината, бев упатен да се јавам кај инспектор што повеќе бил запознаен со ситуацијата на терен.

Се јавив кај инспекторот, на неговиот личен, мобилен телефонски број. Разговаравме околу 6,5 минути. Му објаснив што е проблемот и кои ми се очекувањата, па потоа тој ми објасни дека:

  • свесно избираат да не ги чистат сите улици во Радишани и тоа би требало да ни е на нас жителите нормално,
  • ако има фрлено сол на една споредна уличка, тоа не значи дека треба да има фрлено сол на сите споредни улички,
  • немаат доволно сол за да фрлат на сите улици во Радишани, па колку имале, толку фрлиле
  • не чистат одредени улици зашто биле непристапни заради паркирани возила
  • чистат само критични делови на угорнини или удолнини
  • #тоа_е

При крај на разговорот го прашав дали јас кај него можам да поднесам пријава за тоа што не е исчитена улицата. Рече да. Откако реков: ајде да поднесам, се предомисли, па во свои зборови рече дека нема такво нешто. Потоа прашав дали тужба до општината Бутел е единствената опција што ми преостанува? Тој рече дека ако сметам дека сум во право, да.

Улица 1558 на 6. јануари 2017 година.

Улица 1558 денес, на 10. јануари 2017 година.

img_20170110_144001_hdr

Поздрав Петре, до следните локални избори.

Книги со поими – Миланка и Лазо Средановиќ, 1983 г.

Расчистувајќи низ подрум, најдов две интересни илустрирани детски сликовници од 1983 година, од првото издание „Книги со поими“ на Душанка Кољевиќ, Славојка Блечиќ и Томислав Ракочевиќ, а илустрирано од Миланка и Лазо Средановиќ.

  • Уредник и стручно мислење: Војин Анчиќ.
  • Заедничко издание: ИРО „Вук Караџиќ“ – Белград, НИШРО „Дневник“ – Нови Сад и НИШРО Вараждин.
  • За издавачите: Слободан Ѓуриќ, Владислав Стефанов и Бранко Храшчанец.
  • Печати НИШРО Вараждин 1983.
  • Тираж: 5.000

Книгите се печатени двострано и се превиткуваат, така што на една книга има две лица кои содржат илустрации на различна тема. Двете книги што ги најдов се насловени: „Живот во градот и Живот на село“ и „Зима и есен и Пролет и лето“.

Ги споделувам во прилог на овој напис, а достапни се и за преземање преку Issuu.

Џиновска сликовница „АБВ“ – Дарко Марковиќ, Оливера Николова, Скопје 1987

Кога јас бев дете, многу популарна беше „Бушава Азбука“ и сѐ што доаѓаше со неа.

Дарко Марковиќ и Оливера Николова своевремено имаат изработено фантастична илустрирана џиновска сликовница „АБВ“, којашто се плашам дека речиси сигурно оди во заборав. За тоа да не се случи набрзо, еве ја во прилог на овој напис за слободно прегледување, а ако сакате, можете и да ја преземете како PDF.

Библиотека „РОСИЦА“

НИПРО „Нова Македонија“
Директор:
Радослав Огњановски

Издавач:
ООЗТ Редакција „Детска радост“
Директор и главен уредник:
Петре Бакевски

Одговорен уредник, дизајн
и ликовно-графичко обликување:
Александар Цветкоски

Лектура и коректура:
Здравко Ќорвезировски

Рецензенти:
д-р Никола Петров
д-р Натка Мицковиќ

Сликовницата е издадена како програмска активност на Републичката самоуправна интересна заедница за предучилишно и основно воспитание и образование и општествена заштита на децата.

Печат и целосна реализација во погоните
на НИПРО „Нова Македонија“ ООЗТ Печатница, Скопје 1987

Тираж: 5.000

© Детска радост, Скопје, Југославија

Жал ми е што толку многу доцниме со дигитализацијата на нашето културно наследство, но во исто време сум многу среќен што сум јас зачувал оваа сликовница и колку толку останала неоштетена.

Сликано со мобилен телефон и со низок квалитет.

Споделете.

Рутирање на KingZone N5 и бришење на Launcher3

Не многу одамна си купив KingZone N5 од AMC. Телефонот го продаваат нерутиран, со повеќе бескорисни апликации што се вградени во испорачаниот ROM. Launcher3 е една од тие апликации. Работи постојано додека телефонот е вклучен и без контрола прикажува банални реклами. Ја троши батеријата многу брзо и целосно го уништува корисничкото искуство на овој телефон, кој инаку има релативно добар хардвер.

Не сум сигурен дали Launcher3 е самиот по себе проблематичен или пак таква е само верзијата што доаѓа со телефонот.

Решив да се ослободам од Launcher3 по секоја цена и да го флешувам телефонот со друг ROM, којшто на крајот се покажа како бескорисен, бидејќи не ми го препозна процесорот. Бидејќи веќе ги пребришав партициите, телефонот беше бескорисен и морав одново да го инсталирам ROM-от што го испорачуваат од KingZone. Во тоа успеав со алатки што ги нудат од KingZone.

Кога го вклучив телефонот по флешувањето, не можев да ја користам SIM-картичката, бидејќи во текот на флешувањето била променета вредноста IMEI – уникатна за секој уред. Некаде прочитав дека со Hard Reset можело да се ресетира и таа, но тоа на мене не ми успеа. Потоа, најдов команда со којашто успеав да ја вратам основната вредност на IMEI, во т.н. Engineer mode [*#*#3646633#*#*] и ја поработев SIM-картичката. Командата ја внесов во Engineer Mode -> Connectivity -> CDS Information -> Radio Information -> Phone 1 [практично, број на лежиште за сим-картичка].

Командата е: AT +EGMR=1,7,"бројот на IMEI". Вредноста на IMEI ја пишува на самиот мобилен телефон, под неговата батерија или некаде во гаранцијата на AMC. Внесувајте внимателно, зашто командата без празно место помеѓу AT и +EGMR, нема да се изврши.

Ми остана уште да го рутирам телефонот, па со малку повеќе истражување стигнав до KingoRoot.

Рутурањето со KingoRoot е неверојатно едноставно и го препорачувам — буквално „One Click Android Root Apk/Software“. За жал, достапен е само за Windows.

Сѐ што ми остана беше да инсталирам некаква апликација за бришење на системски апликации. Најпрвин го инсталирав CCleaner, но бришењето беше нецелосно, па решив да се обидам со System app remover (ROOT). Овој пат успешно го избришав Launcher3, заедно со уште неколку сервиси што не беа означени со [Should keep] и го рестартирав телефонот.

Успех! Сосема поинакво искуство. Ги нема рекламите, а телефонот сега работи значително побрзо и батеријата трае многу подолго.